تهانى العيد

قالوا عيدكم الجمعة ، رجعوا قالو الخميس، قلت ألحق أهنى أحسن يقولوا مفيش عيد

-

كل سنة و انتم طيبين بمناسبة عيد شم النسيم، جمعية مرضى الزهايمر

-

كل عام و انتم بخير، أعلنت السعودية أن غداً الأربعاء هو ثالث أيام عيد الأضحى!

-

ان الله يغفر ما بينه و بين العبد لكنه لا يغفر بين العباد، فأرجو أن تسامحينى ان كنت أخطأت فى حقك، اغتبتك، أساءت الظن بكى... كل سنة و انتى طيبة.تهنئة من صديقة ذاهبة الى الحج

-

Happy feast, full of meat, friends meet, conflicts beat, clean feet, relatives greet, cloths neat, love heat, money bel3abeet, don't delete TARABATATEET :)

-

كلها رسائل تلقيتها على الهاتف المحمول، و فى كل عيد يظهر عدد من الرسائل الجديدة المبتكرة، الناس ما بقتش بتكلم بعض أو تحاول تقابل بعض و تقول كل سنة و انتم طيبين زى زمان، اما رسالة قصيرة، اما بريد الكترونى، ودى فى نظرى من عيوب التكنولوجيا!!

-

عيد سعيد على الجميع

تعب الطفولة

اليومين دول حسة زى ما أكون طفلة صغيرة، أنام فى العربية مع أهلى فى طريقى لزيارة العائلة، أروح لطنط زوزو أخش أنام عندها برده، أروح عند أصدقائى أتغطى بالبطانية و أسنح شوية، أروح البيت و أنام بلبس الخروج، و ماما تنادى يا بنتى اصحى غيرى هدومك، ما فيش فايدة.
صحيت بدرى النهارده بعد يومين نوم متصلين. و هأخرج للتنزه قريباً

أمسية دافئة

قضيناها بالأمس فى زيارة للأخين غ، مع مشروب الجنزبيل بالقرفة و عيش بلدى بالجبنة البيضاء.

شخصية

جميلة جداً، أول واحدة اتعرفت عليها فى الدنيا دى، طيبة بشكل غريب، تحب الخير المطلق لكل الناس، بتيجى كتير على نفسها علشان غيرها، اللى أنا منهم.

أد ايه أنا بأحبها، و لكن ليه كتير بأزعلها؟؟ مش عارفة!!
ربنا يخليكى لي يا أمى.

الانسان لازم يبقى متوازن..

فى انفعالاته، علاقاته، راحته، نشاطه، فى كل حاجة. مافيش حاجة تيجى على حاجة
دى كلمات أمى الشهيرة جداً، تذكرتها عند قراءة:
"أحبب حبيبك هوناً ما، فعسى أن يكون بغيضك يوماً ما، و أبغض بغيضك هوناً ما، فعسى أن يكون حبيبك يوماً ما"
عموماً الانسان انفعالى جدا بطبيعة الحالً و ساعات كتيرة الواحد بيعمل توقعات لأشياء و لا يجدها فى علاقاته، فى عمله، فى حياته، علشان كده يتهيألى الواحد لازم يحاول على قد ما يقدر انه يبقى متوازن فى اللى بيعطيه للشئ و اللى ينتظره منه، بدل ما يواجه كثير من الاحباطات على طول الطريق. و ده جزء من نظرية (البلانص).

البِشعة "ElBesh3a"

تم تصحيح المعلومة:
طريقة لكشف الكذب عن طريق احضار طاسة سخنة ولعة و المشكوك فى أمره يضع لسانه على الطاسة لو اتلسع يبقى كداب و العكس صحيح.
الكداب المفروض يتعرف لأن ريقه هيبقى ناشف فهيتلسع.

ولكن طاسة الخضة بتستخدم فى ايه لو حد يعرف يقولى

لحظة سكون...لحظة صفا... لحظة سلام... لحظة رضا

كلمات جميلة لأغنية معبرة جداً غناها أحد الأصدقاء فى ليلة رأ س السنة فى سيناء...سأحاول أن أحصل على كلماتها و أكتبها، لأنها تعبر فعلاً عن الدربكة و اللخبطة اللى فى كل نفس بشرية، جاية فعلاً من الأعماق.

كنت قد عزمت حتى يوم الخميس عدم الذهاب مع أصدقائى لسيناء و ذلك لأسباب عائلية، و بالفعل رحل الأصدقاء و سافروا، و أفاجأ بعد الساعة الثامنة بتليفون.. ايه ده انتى ما سافرتيش، طب ياله تعالى معانا احنا مسافرين دلوقتى، طرقعت الفكرة فى دماغى، و فى نصف ساعة تم الاستعداد، ووصلنا فى صباح يوم الجمعة آخر أيام 2004 الى الكرم.

و أنا سعيدة انى فى الآخر سافرت و ما قعدتش هنا، كنت محتاجة حبة هدوء. أول يوم تنزهنا الى بقايا مدينة نبطية، واستمعنا لشرح صديق لنا عن فخ النمر و عن حيوان النمر الذى لا يتواجد الا فى سيناء. (صديقتنا النعامة كتبت برده عن الموضوع ده)

ليلة رأس السنة:
طاقة غنائية غريبة: "30 سنة تليفزيون" أغانى وطنية، طفولية، اعلانات، مسرحيات... الخ.. ، كانت أمسية ظريفة جداً قضيتها مع أصدقائى الأعزء لتانى سنة و مع أصدقاء جدد استمتعت جداً بصحبتهم.

أول يوم فى السنة الجديدة:
ذهبت الى نزهة طويلة حيث تسلقنا جبل البنات (سبب التسمية ان 3 بنات ربطوا ضفايرهم فى بعض و انتحروا من فوق هذا الجبل بسبب رغبة أهلهم فى تجويزهم بالعافية).

المنظر من فوق الجبل خلاب، سبحان الله، سيناء دائماً تبعث فى نفسى شعور بالرهبة، فالأرض مقدسة، و هذه الجبال و الوديان مر فيها كثير من الأنبياء و كانت معبر للأديان..

الجبال جميلة و قوية و تبعث فى النفس احساس مختلف عن الصحراء الغربية حيث تشعر بنعومة و جمال الكثبان الرملية و الصخور الجيرية الناصعة البياض ذات الأشكال المختلفة التى تطلق عنان الخيال.
فوق الجبل المرتفع جلست أستمع الى هدوء الطبيعة و الى نفسى و أفكر و أتأمل كثيراً، و أخذت أردد كلمات الأغنية مرة أخرى:
لحظة سكون...لحظة صفا... لحظة سلام... لحظة رضا
أدفع حياتى و أحسها.

كل سنة و انتم طيبين